Hari ngantung nama 6 Apr, lalu muai undi kena 16 April

Hari ngantung nama 6 Apr, lalu muai undi kena 16 April by Rengenyan Labang. Posted on March 24, 2011, Thursday Bisi 979,796 pengundi ke udah ngerijister ke nyangkaum 18,363 pengundi ngena pos, ku Abdul Aziz Yusof MUAI UNDI: Abdul Aziz (tengah) dalam aum pengarang berita bekaul enggau pengawa bepilih besai menua ke-10 DUN Sarawak. KUCHING: Komiti Pengawa Bepilih Malaysia (SPR) udah netapka pengawa bepilih besai menua ke-10 Kunsil Nengeri (DUN) Sarawak deka diatur kena 16 April 2011. Chairman Komiti Pengawa Bepilih Malaysia, Tan Sri Abdul Aziz Mohd Yusof madahka timpuh nya ditetapka beduduk ari ke udah nerima penerang ke bendar ari Tuai Pemegai Menua Sarawak kena 21 Mac 2011 DUN Sarawak diketuka. “SPR udah netapka kena 06 April 2011 endur pengawa ngantung nama dipejalaika, lalu pengawa bepilih besai (muai undi) menua Sarawak ti ke-10 deka diatur kena 16 April 2011. Enti sema bisi betanding. “Lalu 23 Mac 2011 writ tauka surat ngemendarka pengawa bepilih menua Sarawak ke-10 dipejalaika (haribulan mansutka writ) lalu kena 25 Mac 2011 endur Notis Pengawa Bepilih dipansutka,” pia ku Abdul Aziz. Abdul Aziz mansutka penerang iya dalam aum pengarang berita bekaul enggau pengawa bepilih besai menua Sarawak ti ke-10 ke diatur ba Hotel Pullman, Kuching ditu, kemari. Nitihka Fasal (4) Perkara 21 Perlembagaan Negeri Sarawak, SPR patut ngatur pengawa bepilih dalam timpuh enam puluh (60) hari ari timpuh DUN udah diketuka. Abdul Aziz lebuh bejaku madahka kena ngelancharka pengawa bepilih besai menua ke-10 DUN Sarawak, SPR dalam aum udah mutuska 71 iku Pemesai Pengatur Pengawa Bepilih enggau 165 Pemantu Pemesai Pengatur Pengawa Bepilih udah dipilih mantu ba pengawa bepilih menua Sarawak. Kena matau sepemanjai pengawa bekimpin tu , SPR udah mutus numbuhka 80 Raban Penerit Adat Kimpin Pengawa Bepilih (PP-KPR) ti betuaika seiku Pemesai Penerit Adat ba tiap raban, pia ku Abdul Aziz. SPR ku iya ba pengawa bepilih besai menua Ke-10 DUN Sarawak begunaka 1,749 Palan Mengundi ke bisi 2,606 pati alai ngundi. “Seraban 24,379 pemesai enggau raban pengereja pengawa maya bepilih deka dipadu kena mantu SPR bejalai sereta ngelancharka pengawa bepilih besai menua Ke-10 DUN Sarawak. “Dipelaba penyampau ungkus belanja dikena bejalaika pengawa bepilih besai menua Sarawak tu iya nya sepenyampau RM50 juta,” ku iya. SPR nyendiaka perengka pengangkut langit, ai enggau darat iya nya nyengkaum 843 buah perau, kereta pacuan empat roda (4,449), bilun engkabang (27) enggau bilun mit dua (2) buah, tu dikena ngagai menua pesisir ke jauh di ulu engtigis sereta ke nadai penyambung. Ba pengawa bepilih besai menua Sarawak, Nama Pengundi (Daftar Pemilih) ke dikena iya nya Nama Pengundi (DPI) 2009, Nama Pengundi Tambah Suku Taun Keterubah 2010, Suku Taun Kedua 2010, Suku Taun Ketiga 2010 enggau Suku Taun Keempat 2010 ti udah ‘Diwartakan’ kena 25 Mac 2011. “Penyampau Nama Pengundi iya nya 979,796 pengundi ke udah ngerijister ke nyangkaum 961,433 pengundi biasa enggau 18,363 ngundi ngena pos. “Nama Pengundi Pengawa Bepilih ba pengawa bepilih besai Sarawak tu deka berengkah dijual kena 28 Mac 2011. Pengundi menua tu ulih nemu Palan Ngundi enggau alai sida ngundi nengah ruai siber SPR (www.spr.gov.my) tauka nengah Pesan Jaku Pandak (SMS) semina taip SPR SEMAK NO. KAD PENGENALAN lalu anjung ngagai 15888 berengkah 28 Mac 2011. Kelimpah ari nya pengundi tau betelefon ngagai Indu Opis SPR ba Putrajaya (03-88856500) tauka Opis Pengawa Bepilih Menua Sarawak 082-254 867.